تصحيح المعلومات أو الخزعبلات المنتشره عن الحيوانات
موضوع اليوم بعنوان #تصحيح لبعض الخرافات المنتشرة عن الزواحف ،1- "لو ما أذيتش التعبان مش هيأذيك" المقولة دى هى الوحيدة اللى اثبت صحتها علميا لان الزواحف حيوانات دفاعية بمعنى انها مش هتلدغ الا اذا تطفل عليها شخص ما وقام بامساكها وطبعا لدغها فالحالة دى بتكون دفاع عن نفسها ،2- " التعبان لو اتقتل وليفتة بتييجى تنتقم لة" المقولة دى نصها صح والنص التانى مالوش اى اساس من الصحة الذكر بييجى يدور على الانثى فعلا ولكن بغرض التزاوج وليس الانتقام كما يقال وطبعا الذكور بتتبع الاناث عن طريق الفيرمونات اللى بتتركها الاناث للذكور اثناء موسم التزاوج ،3- "المكان اللى موجود فية تعابين بيحوى تعابين تانية" زى ما شرحت بردو فالنقطة السابقة الاناث بتترك الفيرمونات للذكور عشان تتبعها اثناء موسم التزاوج "والكلام دة فالطبيعة" نركز واذا التعبان دة اتاخد من البيئة بتاعتة لمكان اخر بعيد عن التويع الجغرافى بتاعة مفيش اى تعابين ممكن تيجى لانة خارج عن التوزيع الجغرافى بتاعة اصلا ، 4- "التعبان لو اتقطعت راسة .. الرأس بتفضل صاحية وبتربى جسم وبينتقم من اللى قتلة" طبعا المقولة دى مش صحيحة الثعبان لو اتفطع رأسة بتظل رأسة تتحرك بضع دقائق فقط ومن ثم بيموت ،5-"الثعبان بينظر لعين الانسان وبيحتفظ بصورة لية فذاكرتة وبييجى ينتقم منة بردو " بردو مفيش حاجة اسمها كدة ودى مجرد خرافات ليس الا ،6-"التعبان بياكل بيض" البيض خارج عن القائمة الغذائية الخاصة بالثعابين باستثناء بعض الانواع زى الفارغة ،طيب اومال التعابين بتتغذى على اية ؟ بتتغذى على القوارض والثدييات والطيور والزواحف والحشرات 7-"التعابين بتبخ سم ف الاكل" الثعابين عامة بنتقسم ل3 انواع من حيث درجة السمية (سامة ومتوسطة السمية وغير سامة) مش كلها سامة !! واحنا عندنا فمصر 39نوع 9 فقط منهم ساميين والنوع الوحيد الوحيد من الانواع السامة اللى عندنا بيبثق السم هو الكوبرا الباثقة فقط (البخاخ) وبتتواجد من اسيوط حتى حدود مصر مع السودان جنوبا 8-"التعبان بيبقى عندة حجر لؤلؤ فرأسة " "وتستطيع بعض التعابين الطيران والتحليق" طبعا الكلام دة كلة كذب وغير حقيقى 9-"التعابين ف مصر بتوصل ل12متر وووو.." ششش مفيش حاجة اسمها كدة اطول نوع عندنا فمصر اصلا اللى هو الكوبرا المصرية مابيتعداش ال3 امتار واطول تعبان فالعالم حاليا مابيتعداش ال9 امتار 10- "التعابين بتصفر" انا مش عارف اجيبهالكم ازاى بس التعابين ماعندهاش حنجرة اساسا واصوات الفحيح اللى بتعملها بعض الانواع زى الخضيرى مثلا سببها الهوا اللى بتستنشقة وبعدين بتخرجة لكن هى ماعندهاش حنجرة اصلا !! ،11- "التعبان بيسمع الحاوى لما بيناديلة بالذكر والاذكار الخ "مش عارف اجيبهالكم ازاى بردو بس التعابين ماعندهاش اذن عشان تسمع و بتعتمد على الاهتزازات الارضية فقط ، 12- "الحاوى بيحوى الناس من التعابين وبيبقى معاة العهد او الطريقة الرفاعية وبيقدر يعرف اماكن التعابين ف البيوت " النقطة دى هتطول شوية بس مهمة جداا ف نركز اولا ربنا ماسخرش لحد الحيوانات يعرف لغتها ويخاطبها بعد سيدنا سليمان فمفيش حاجة اسمها شخص يتكلم مع تعابين وتجيلة وتصفرلة وبردو هو لايعلم الغيب عشان يعرف البيت دة فية تعابين او لا الصياد لولا الجرة اللى بيتركها الثعبان فالطبيعة مش هيعرف يوصل للتعبان !! طيب هو لما بيدخل ويقول ع مكان فى تعبان بيطلع فية دة ازاى ؟! هاقوللك مش يمكن داخل بية وكان شايلة معاة مثلا ؟ طيب موضوع انة بيحوى الناس دة اية ؟ هاقوللك هو بيستخدم ثعبان من الانواع الغير سامة على البشر ويكدب على الناس اللى مش عارفة ان النوع دة غير سام اصلا !! ويقوللهم هاخلية يلدغكم وكدة انتو اتحويتو منة ومفيش حاجة هتقربلكم طبعا كلام كلة كذب ولو حد صادف تعبان فيوم من الايام وتطفل علية هايلدغة تانى طيب هو لية بيعمل كدة يا اسلام ؟! عشان دى شغلتة نصاب !!! ،13-"لو حد لاقدر الله اتلدغ من ثعبان سام يربط ويشرط ولا يربط بس" لو حد لا قدر الله اتلدغ من نوع سام بيربط فى حال كانت اللدغة فى الاطراف وبيربط قبل مكان اللدغة وبعدها وممكن يضع بعض الثلج حوالين اللدغة لتقليل حركة السم فالجسم وممنوع بتاتا التشريط لان لية عواقب وخيمة 14-ممكن استخدم كحول او امتص السم بالفم فى حال لدغت لاا قدر الله لحد ما اوصل المستشفى" طبعا غلط جدااا وماينفعش استخدم اى شيئ دون استشارة الطبيب وامتصاص السم مش بيخرج السم بالعكس وكمان السم بينتقل لفم الشخص اللى قام بامتصاصة 15-"ممكن اخد المصل المضاد للسم لوحدى لو لا قدر الله اتلدغت" لا طبعا لازم تروح لمستشفى وتخضع لبعض الاختبارات الطيبة زى اختبار السيولة اللى بيحدد هتجتاج كمية اد اية من المصل " 16-" اللى بيتلدغ من تعبان سام مرة ويتكتب لة عمر لو اتلدغ تانى بتبقى مناعتة قوية ومش بيتائثر ؟ " غلط طبعا بل بالعكس مناعتة بتضعف اكتر واكتر ، 17-"هل تربية الثعابين حرام" الدين حرم تربية الثعابين السامة فقط اى شيئ يضر بالفرد والمجتمع هو حرام 18-"الابراص بتبخ سم ف الاكل" الابراص غير سامة اصلا !! 19-الورل ابن التمساح" لا طبعا دة نوع ودة نوع تانى خالص اية اللى هيجيب السحالى للبرمائيات ؟ ، ، 20- البومة بتسحب النظر وبتعتبر فال وحش ؟ وهل السلحفاة بتجيب الخير فعلا ؟والخفاش بيلزق فالوش بجد ولا كلام ؟ اولا الخير والشر دول حاجة بايد ربنا مالهمش علاقة بالحيوانات دول كائنات بتؤدى دورها فالطبيعة مالهاش اى علاقة بالكلام اللى بقولة دة ، طيب الخفاش؟! مفيش حاجة اسمها بيلزق فالوش وبيطلع بالجلد ماتقعد مع جدتك تانى ، 21- لو دبجت خفاش وحطيتة ع راس اختى اللى مش بتنجب هاتنجب ؟! ولا اخضها بزاحف مثلا ولا اجيب زاحف متحنط احطة ع الباب يشيل العين ؟! بوص مبدائيا طلاما انتا وصلت للاسئلة دى يبقى تنزل من العربية خالص
طبعا دة كلام ينم عن جهل وعدم وعى ومنقول من ناس لا تفقة شيئ لو الكلام دة صح يبقى نلغى دور الطب والدكاترة المختصين فامراض النساء والتوليد ، نسيتك كمان فى ابتلاء من ربنا احيانا بيبتلى بية البعض وهو مرض العقم وبيكون طبعا اختبار من الله عز وجل فيستحيل ينجب الا بارادة الله وتدخل طبى مفيش حاجة اسمها يتخض او ادبح روح مالهاش اى ذنب عشان تنجب ، كفايا نسمع لاى كلام من اى حد وناخدة مصدر ثقة دون تفنيدة اوالبحث عن صحتة زى ما سمعت اتاكد من المعلومة ماتقبلهاش زى ماهى ،اغلب المعلومات بتكون خاطئة احيانا او من مصادر خاطئة او مش من مصادر علمية فلازم تقرأ وتثقف نفسك وتتعلم احنا اغلبنا متعلمين ماينفعش نسمع لكلام الجهل والخرافات ونديلة الاولوية ونبدية عن العلم ، اتعود تسمع من مصدر المعلومة نفسها
تعليقات
إرسال تعليق